Францияның Құрметті консулдығы Шымкентте ашылды

Шымкент қаласында Францияның Құрметті консулдығы ресми түрде ашылды. Бұл бастама Шымкент әкімдігі мен Францияның Қазақстандағы Елшілігі арасында 2025-2028 жылдары жүзеге асырылатын бірлескен жобаларды қамтитын Ынтымақтастық жөніндегі жол картасы аясында қолға алынды.

Консулдықтың қызметтері

Жаңа консулдықтың ашылуы Франция мен Шымкент арасындағы дипломатиялық, экономикалық, мәдени және ғылыми байланысты одан әрі нығайтуға ықпал етеді. Консулдық Қазақстандағы Франция азаматтарының құқықтары мен мүдделерін қорғауға, сондай-ақ, сауда-экономикалық байланыстарды дамытуға бағытталған қызметтер көрсетеді.

Инвестиция тарту және халықаралық ынтымақтастық

Консулдықтың міндеттеріне құжаттарды (паспорттар, визалар және т.б.) алуға көмек көрсету, француз тауарлары мен қызметтерін жергілікті нарықта ілгерілету, екі ел арасындағы экономикалық, ғылыми және сауда ынтымақтастығын дамыту кіреді. Сонымен қатар, мәдени және білім беру іс-шараларын ұйымдастыруға қолдау көрсету де жоспарланған.

Францияның Шымкент қаласындағы Құрметті консулдығының ашылуы өңірдің халықаралық серіктестікке ашықтығын көрсетіп, Шымкенттің жаһандық деңгейдегі беделін арттыруға бағытталған маңызды қадам болып табылады. Бұл шара инвестиция тартуға, бірлескен жобаларды жүзеге асыруға және халықаралық ынтымақтастықты кеңейтуге серпін береді.