Ардақ Назаров: "Регламентті бұзбадым" - Депутат ответил на критику после поздравления матери на заседании Мажилиса

Мәжіліс отырысында анасын мерейтойымен құттықтаған депутат Ардақ Назаров қоғамда пікірталас тудырған мәлімдемесіне жауап берді. Назаровтың айтуынша, ол анасын құрметтемей жүргендерге үлгі болсын деп сөз сөйлеген.

"Мен анасын құрметтемей жүргендерге үлгі болсын деп айттым. Жалпы халық қарсы емес, тек кейбір адамдардың ниеті бөлек. Анасын сыйлай алмайтындар қарсы, ал ата-анасын ардақтайтындар қолдайды. Сондықтан өз бағытымнан қайтпаймын. Анасын, әкесін сыйлаған адам ғана еліне адал қызмет ете алады", – деді ол.

Регламент мәселесі

Депутаттың сөздері регламент бұзылды ма деген сұраққа жауап ретінде айтылды. Назаров ананың дәрежесі бәрінен жоғары екенін атап өтті.

"Бұздым деп ойламаймын. Қазақстанда анасын қорлап, әкесін ұрып жатқан жағдайлар бар. Менің сөзім соған өнеге болсын деген мақсатта айтылды", – деді депутат.

Бұл Назаровтың алғашқы түсініктемесі емес. Бұған дейін ол халықтың сынына Instagram парақшасында да жауап жазған еді.

"Анасын туған күнімен құттықтады деп даурығып жатқандарға жол болсын. Кеше ғана әкесін қорлап, тепкілеп жатқан видеоны көрдік. Осындай жағдай қайталанбауы үшін мінберден ата-анаға құрмет жайлы айтқым келді. Мәселе – Парламент төрінде құттықтағанымда емес, мәселе – қайда жүрсең де ата-анаңды сыйлауда" – деп жазды депутат.

Ардақ Назаровтың құттықтауына қоғамда реакция әртүрлі болды. Кейбір әлеуметтік желі қолданушылары Мәжіліс отырысын "Поле чудес" бағдарламасына теңесе, енді біреулері депутатты қатаң сынап, Парламент қабырғасында қатаң регламент пен протокол сақталуы тиіс екенін еске салды. Тіпті оның құттықтауынан кейін әлеуметтік желіде түрлі мемдер мен пародиялық видеолар пайда болды.